Tala FaaSamoa

Tala ile Gagana Samoa

Ole Palolo Mua. Tusia e Nese Uelese

10/14/2016

O le Vaotele ma le maile pa'epa'e
Vaega 2
Sa gata le tatou tala ina ua ou taunuu atu o loo faatali mai si ou tama i luga o le auala, sa ou fesili i le maile lea sa muamua mai i ou luma ae fai ma lo'u tama e lei vaai se maile. Usi mai loa lau faitau.
Ua ma o atu loa i totonu o le fale, o le fale o le leoleo po a le malo lea ma te vaaia masini a le malo o loo faia le auala, e fola laupapa e pao pe a savali ai se tagata.
Sa fai le ma meaai i le isi itu, ao le isi itu ua uma ona tautau ai le ma tainamu e lanu Enaena ona e namuasua i le afi o tafunai a lou tama lea e fai mai fafo, fai mai ou te alu ou te malolo sei alu e tuu nisi fafie i laau tetele o loo tafu ai afi i lalo i autafa lava o le fale ina ia pepe, sa leai sou malolo ae ou mulimuli solo i lo'u tama ona o lo'u matafefe, ua ma momoe i lena po, ua taaligoligoa le po, pau lava le leo lea e lagona o le tagi a le lulu mata omo lea e tagi mai i luga o le laau e le mamao atu ma le fale. O fafo o loo laina mai ai masini a le malo, o luma laititi atu o le auala tele i le vaivao o Pu'apu'a ma Samalaeulu.
Ua amata ona ou faagalegale moe, o o'u autafa o loo moe ai si o'u tama, ae ou faalogoina loa le ou a le maile, e tasi le ou latalata mai e pei lava o luma o le fale, toe ou, faalogo atu pei o luma o le auala tele ma le isi ou mulimuli, ua mamao a i lau faalogo, ua oso lou fefe, o lou tama o lae moiini ona mata ae le o moe lae na te iloa au lea e autilo solo i fafo, e lei umi a ae ou faalogoina le savali o le tagata i totonu o le fale.
O lou tama lea ua faamu tele le ma moli matagi, ma le ma vaai atu o le tamaloa lae fusi le pou o le fale ma autilo mai i totonu o le tainamu, ua tata vale lou fatu, ua oso i fafo lou tama ma sole atu i le tamaloa, ona tali mai lea o le tamaloa ma aioi mai mo sina vai ua galala i le fia inu, o fafo o le fale o loo iai kalone vai e faatali i le timu, ua inu le tamaloa ona toe aioi mai foi lea i sina meaai, o mea uma na totoe ua fai ai le taumafataga a le tamaloa. Ua le ea i luga pei ose tagata e lei ai le tausaga atoa.
E umi pae'e toe uumi lona ulu, e fai le ava ma ona lavalava e masae le ofu tino ae palapala lona ofuvae. Ua talatalanoa ma si ou tama ua manino nei o le tagata mo'i. Fai mai si ana tala, o lona igoa o Lemisio Amosa mai Safotu, o loo alu atu e alu i le maliu o le latou aiga ae ua leai se auala, sa sau le va'a moe, ona maua lea o lana lifi mai Lalomalava ae o le aiga e nonofo i Lano, lea na toe savali mai ai, na iloa e iai le fale o le leoleo po i le va lea, o lea na tulituli mai ai mo sina vai.
Ua alofa si ou tama isi nei tamaloa ona alu lea ave iai lona ofu tino fou sa iai ma lona ofu vae ma le fusi pa'u, ua fai mai e fia taele ona faamalu lea i le pogisa ona fai mai loa lea o ia o le a savali e faaauau lana savaliga atonu e toe maua sana lifi i Safotu, ua alu le tamaloa ma ua uma foi ona momoli lana faafetai e tusa ai ma le agalelei ia ia.
Pe tusa e 2 aso na va ai, ae tata mai loa i le 2AP i Apia le pagota ua sola mai tua mai Tafaigata, e tutusa lelei ma le tamaloa lea ae ese le igoa.
O le Palolomua. Toe tulitatao mai le vaega lona 3 o le Vaotele ma le maile pa'epa'e. Poo se taimi o le masina fou. Manuia lau faitau.
O le Palolomua, O le nofoaga e lolo iai mafaufauga, e faaosofofia le tagata e pese, pe ata, pe tagi foi.

10/7/2016

Ua ta mai le logo o le malologa, ua gasolo tamaiti aoga i lalo o laau ma a latou lunch, o nisi tamaiti e tau feololo aiga i na vaitaimi e maua le falaoa, ao nisi foi tamaiti e ausage nai o latou aiga, a le ose fasi ulu na totoe mai anapo ua uma ona fisi fisi, ia ose popo ma se fasi esi. O le aoga Tulaga lua a le Nu'u e tu i uta e tu lata i le toga niu, o le masani na iai i na aso, o nai tamaiti e leai ni lunch e o e sue popo mai ai iina. E manaia na Aso, e lei maua ni telefoni feavea'i, e talatalanoa ma taaalo fiafia tamaiti, e sue mai se fue ona ta lea e nisi se toa lua ae tulioso isi tamaiti o le vasega, o nisi e fai voli laau, ao nisi foi e fai tuliga i oga totonu o le malae.
E fiafia tele pe a fai fafaga a faiaoga i le aoauli ona e umi ai malologa. A oo loa i Aso Faraile ua fai pese. e toto e faatasi tamaiti ma faiaoga pe a iai se fua taimi ma se faaluma malie, o na foi Aso e tufa ai masi susu o nisi o meaalofa mai Niu Sila mo aoga Tulaga lua i Samoa. sa 3 kuata. e iai isi kuata a lata lata o le a uma ona fai lea o le Ata Tifaga o polokalame a le malo ina vaitaimi. o le tele o ata sa faaali o le faamanatuina lea o malo Tutoatasi a nisi o motu o le Pasefika.
O le masina o Tesema e fai ai laugatogi ma iloa ai Kolisi poo aoga faa Itumalo e o iai le Form 2. e fai fiafia a vasega taitasi, e aai faatasi uma ai foi matua, o aiga ma tamaiti aoga. ae o le sasala ia o le manogi o ula lagaali ma le mosooi ia ua manogi manaia ai totonu o le Faleaoga. A maua mai iuga o Suega ae au se tamaititi i le Kolisi i Samoa, Avele po'o Vaipouli, ua fiafia tele le Pule aoga ma le Nu'u aemaise ai lava matua. o le tina ua tagi ma fusi si ana tama ona ua taui galuega fita sa feagai ai le tausaga atoa, o le tufiina o le popo, faatauga tauaga i le maketi aua pili o aoga ma toniga o kuata e 3 e le faigofie. E le faigofie le sailiga o le Poto.
O nisi na o tala o le Palolomua. manuia lau faitau Samoa.

10/2/2016

Ua tetele le fuata ulu, ua vave ona palasi ae tuai le faaaoga, o uta i le talaloa o loo iai le toga ulu a le Nu'u i le fanua faitele e tau o Vailu'u ma Toeleve, e usu po lava i le taeao tagata o le Nu'u e o e toli ulu ona o le mamao. O na aso e leai ni taavale toe seasea iai nisi e maua ni seevae. E laa i lalo ma amo pea ato ma le agaese .
O nisi Aso a tuua mai aoga ona fai mai lea o le tina e faatope le aai ae o i uta o loo faatali mai le toeaina e o atu e fai le Masiulu e faaaoga iai nai ulu o le a maimau le palasi. E vavalu ulu le isi vaega ae toli ulu le isi vaeaga ma faasolo mai seia oo ina ua fai mai le toeaina ua lava ona o le a po. Ona tipi tipi lea o fasi ulu sei tulou i totonu o paelo ma tapuni mau ae tuu i lalo ose lua ae faapulou.
Pe tasi, lua pe tolu foi vaiaso ona auauai mai loa lea e fai ai se masi. E vau ma faaalu le sua ona aumai loa lea faapapa ae tao le umu.
A vela ona fai lea o amoga ona tufa loa lea i matua tausi poo e matutua o le Nu'u. E fiafia tele le au matutua le masiulu ae faale fiafia iai tupulaga ma tamaiti masalo o le manogi o le masi. E malosi le manogi e manogi atoa ai le Nu'u. O nei Aso ailoga o toe iai nisi o toe faia ni masiulu ae ua tele ina la'u i le maketi e faatau ai. O le Masiulu ose tasi o taumafa faa Samoa mai anamua.
O le Palolomua.

9/30/2016

O le Ato pa'u lanu Enaena a si ou tama sa fusi i le fasi ieie lesi pito na ave ai ou lavalava i lau malaga muamua i fafo ma o lau malaga muamua foi lea i luga o se Vaalele.
Alo mai o le toe sosooina atu lea o le tatou tala. Sa gata le tatou tala ina ua ou toe foi mai ua taunuu le malaga i le malae vaalele i Faleolo ao o lo'o toe aumai le Ato Enaena ma seevae le ofi ia sa ou lele ai i fafo. Ua taunuu le malaga i Salelologa Savaii. Ua lata ina ua po, ua matou tulioso loa le pasi a le toeaina o Tuilata mai Saasaai, ua tumu i tagata o le matou itumalo ma le Nu'u ua iloa mai au lea faatoa sau mai fafo, ua mimita si ou tina ma talatalanoa ma isi fafine o le matou Nu'u, ao le le e taatia i tua i le keli lau atopau Enaena ua pefua uma ona e lei oo atu le ta ia matou i na Aso.
Ua maea le alalafaga ma le Lotu i lena po, ona talanoa mai lea o nai ou matua sei fai se tala o le malaga ma faamatala atu Atunuu e fia sa ou faimalaga atu iai i luga o Europa, aemaise o Isaraelu ma Aikupito ma le sami ulaula. Oka vaai iai o nisi tala pe moi pe pepelo na o le ma ofa lava o nai ou matua ma si o matou aiga.
Ua malama le taeao o le Aso fou, Ona fai mai lea osi ou tama, e manaomia lou mafaufau ise matou fale lelei, o le faletele lea ei luma, ua toe nei o le tulaga fale ua ave i lalo e le afa matautia o Ofa. O le faleapa lea ei oga totonu lea matou te feomai ai, ua lanu Enaena luga o apa, a timu ua tuu paelo i lalo o le tutulu ma le matou umukuka toititi lava pau.
O si ou tama e faiupu ma ei totomu o le lotofale lona tolu o latou ia o loo vaaia lo matou Nu'u, O ia foi o loo vaaia le matou Ekalesia ona e lei maua se faifeau. E matamuli e fai mai ni fonotaga i lo matou fale ona e leaga lava, o lea sa talosaga mai ai ise tupe mo se matou fale lelei. E 2 vaiaso ae toe vili atu le ofisa o Vaa ou te sauni mo lesi au malaga, ma ou te lele e pu'e le Va'a i Sydney Ausetalia, O le Va'a lea o le Tamaitai Samoa. E 3 Va'a sa faigaluega ai tamaiti Samoa ua faaiuina ma faauu le aoga le Maligi i na Aso. O le Tamaitai Samoa, Tausala Samoa ma le Forum Samoa. Sa faapea lava ona fai, ina ua atoa le 7 masina o ou faigaluega pea i luga o Va'a, na ou tusi ai loa isi ou tama e alu ane le ofisa o Vaa i Sogi i Apia ma tala i tua le tupe ma ave loa e sue se tufuga e amata le galuega o le fale, ua lata ina ua uma lau konekarate ma toe foi ai loa i Samoa mo le Tausaga fou o le 1994, ma faauma ai loa le fale fai piliki ma faataalaelae luma ae faapotu tua. Ua fiafia nai ou matua, ua faafetaia le alofa ma le agalelei o le Alii mo mealelei uma ma le fesoasoani mai i ls lima vaivai. Ua maea le galuega ona fai lea o le tonu, o le a ou sau i Kalaiesetete NZ sei asi si ou uso matua ua 14 tausaga o valavala. E 5 Aso ao i NZ ae maua le tala o loo tigaina si ou tama i le falemai i Tuasivi Savaii o lea sa ou toe oso ai loa i Samoa. Sa ma faamavae ma si ou tama i le Aso lava lea ona oo lea i le po ae amia ai loa e le Atua lana auauna, Ua le matu loimata o le faanoanoa, pau lava lagona na mafanafana ai o afioga Paia a le Atua sa laugaina esi ou tama i Aso Sa taitasi ao ia vaaia le lafu mamoe a le Atua. Tofa tama e manatua pea le Atopa'u lanu Enaena sa ou malaga ai i Vasa e fia ma ua maua ai nei faamanuiaga e Tele.
O le Palolomua. O tala faa Samoa moni e faaosofofia ai lagona ma manatu o e faitau, e toe fafagu mai ai Aso ua alu, i le Olaga faa Samoa moni.

9/29/2016
E eseese auala o faamanuiaga. ua pei ose ula poo se faasolo e manogi ma sasala ma ua puaina mai lona manogi pe a agi ma se matagi mai Sasae i Sisifo, po'o Matu foi i Saute.
O le tele o e ua faamanuiaina lo latou suesue, o e ua lelei aoaoga ma maua avanoa mo nisi Tulaga maualuluga, ua avea nei nisi ma Fomai, o Loia, Faiaoga, Teu tupe, faa Ofisa, O leoleo ma le tele o galuega lelei ua faaeaina ai aiga. O nisi foi ua avea i latou ma mea faigaluega a le Atua, o e ua tala faauto i nisi o Alalafaga ona o le galuega Paia a le Atua.
O nisi e lei lelei aoaoga, faapea foi nisi e lei uuina le peni ma se api, e faapea tala a nisi, e lei alu lava ise aoga. ae galo ai le meaalofa taua a le Atua ma le taleni ua uma ona aoaoina e matua ma nisi o matua tausi e ta'u o tala tu'utaliga ma le tautua matavela e mu mata i le afi mai le teaao seia oo ina afiafi ua tutu moli mo faiga Lotu.
O nisi ia o manuia ua mafai ona faasoa ma maua ei tatou uma ona o aoaoga manaia ma le matagofie ao laiti. o le nofo i lalo ma laulau mai mea tausami a matua, a maea ona faapea mai lea, Faafetai tele ma ia e manuia. aua tatou te manatu mama i nei faamanuiaga e tele ua i o tatou lima. O le faaaloalo ma le amio tausaafia o le tasi lea o tu ma aga a Samoa ia aua nei galo.
Ia manatua i lou Loto, E faafeao oe e le Poto.

O le Palolomua.

Ua tetele le fuata ulu, ua vave ona palasi ae tuai le faaaoga, o uta i le talaloa o loo iai le toga ulu a le Nu'u i le fanua faitele e tau o Vailu'u ma Toeleve, e usu po lava i le taeao tagata o le Nu'u e o e toli ulu ona o le mamao. O na aso e leai ni taavale toe seasea iai nisi e maua ni seevae. E laa i lalo ma amo pea ato ma le agaese .
O nisi Aso a tuua mai aoga ona fai mai lea o le tina e faatope le aai ae o i uta o loo faatali mai le toeaina e o atu e fai le Masiulu e faaaoga iai nai ulu o le a maimau le palasi. E vavalu ulu le isi vaega ae toli ulu le isi vaeaga ma faasolo mai seia oo ina ua fai mai le toeaina ua lava ona o le a po. Ona tipi tipi lea o fasi ulu sei tulou i totonu o paelo ma tapuni mau ae tuu i lalo ose lua ae faapulou.
Pe tasi, lua pe tolu foi vaiaso ona auauai mai loa lea e fai ai se masi. E vau ma faaalu le sua ona aumai loa lea faapapa ae tao le umu.
A vela ona fai lea o amoga ona tufa loa lea i matua tausi poo e matutua o le Nu'u. E fiafia tele le au matutua le masiulu ae faale fiafia iai tupulaga ma tamaiti masalo o le manogi o le masi. E malosi le manogi e manogi atoa ai le Nu'u. O nei Aso ailoga o toe iai nisi o toe faia ni masiulu ae ua tele ina la'u i le maketi e faatau ai. O le Masiulu ose tasi o taumafa faa Samoa mai anamua.
O le Palolomua.

Toe tepa i tua. - O Aso ia ao ou laititi, sa matou nonofo faatasi ai ma tuafafine o si o matou tama, o le tina o lou tama e po pe tau foi, e tauaso, ua matua o ia ma o Aso Sa uma e o ai matou laiti tamaiti e taitai o ia i le falesa, ae mulimuli atu si o matou tama e fai le Lotu.

Sa tasi le ogaumu ae tusa pe toa 3 aiga ma le aofai atoa pe toa 25 i le 30 tagata. Sa oge ma matitiva, e mu i moli penisini ma moli tu, ae a taulaga se pepe ona tutu lea o le moli matagi. E tasi le fale tele e ato i lau ma apa. E fola maa lesi pito ae faasima lesi pito. E 2 faleo'o e te iloa atu ave o le la pe a susulu mai ona e tutulu. Matou te savavali le talaloa i le fia maila e o e vele le maumaga ma ao mai popo aua pili o aoga.

E alu taelega i le vai taele a le Nu'u e taeele faatasi uma ai tama ma teine, e asu mai vai inu i le vai e tau o le Vaitilofia pei ona iai nisi o tala mai anamua a le Atunuu. A oo le po ua pogisa atoa pe a le oso ae le masina, o le leitio uga lanu moana ma le koko Samoa a nai o matou matua e faalogologo ma talatalanoa aua se lumanai o le fanau.

Ua talia talosaga ma anapogi, o le galuega sa taumafai ia tuaa i na Aso ua faamanuiaina. Ua leai ni faleo'o ae ua fale fai piliki ma faipotu. Ua pei lava o loo nonofo i fafo nei. Ua maua taavale ma ua tele le faatoaga, o lafu manu ua tupu ma ola ma ua aeae i manuia sa taumafai mai ai tuaa i aso ua mavae ae paga lea ua fai i lagi folauga a nisi. E maoae le alofa ma le agalelei o le Atua i lana fanau.

O le Palolomua, O le nofoaga e lolo iai mafaufauga, e pese pe tagi. Manuia faasausauga o le afiafi.

Ole Talosaga a Safata ile Malo ina ia vaeluaina Safata mo le Palota i ala Fa'a-le-Aganuu.

Afioga Tuia Pu'a Letoa, Anapu Aialii ma Afemata ma le mamalu ia Safata.

16 March 2015.

Afioga Fofoga Fetalai.
Afioga Palemia.
Afioga Minisita.
Afioga i Sui Mamalu o le Palemene.

MULINU’U.

Afioga e,

MATAUPU : TULAFONO O LE VAELUAINA O LE ITUMALO O SAFATA.

E fa’atulou atu i paia sausaugata i le fala le se’e o lau Afioga i le Fofoga Fetalai. E fa’atulou i le e’e i Va’atapu o le Afioga i le Alii Palemia ma lana Kapeneta. E fa’atulou atu i le nofoia o auoloolo e Sui Mamalu o le Palemene. Tulou, tulou lava!

Ae o le a vaipa ia lo’u gutu, ne’i mea ane ua sipa se lamaga pe lape se fa’amatalaga, a o ta’afi manino, ta’afi tatala ma ta’afi noanoa lau Afioga i le Fofoga Fetalai ma le paia o le Maota i le lau liliuina o le Tulafono o Faiga Palota e pei ona folasia nei.

E tusa ai ma fono tauati a le itumalo na usuia i malae i Togamau ma Siulepa na laulau sasa’a ai le tofa i le Falefa o le Ulugatagifa e tusa ma le afaina o le Itumalo i le Tulafono tau faaofi i le vaeluaina o le Itumalo Safata. O le ala o le fa’atalau’ula ma le Savali a lenei Itumalo, se’i fa’aleo se atugaluga ma se vaivaiga e tusa ai ma le Tulafono i le vaeluaina o le Itumalo. E i ai le talitonuga, o le toe pau lenei o le ta i le fao, ona ta’afi noanoa o le Palemene i lenei Tulafono.

O le tagi a le pu mate i lau Afioga ma le paia i le Palemene, se’i manatua Safata i si ona vao.

O lea ua nofo lelei le tele o Itumalo o lo’o vaeluaina FA’A-LE-AGANU’U e lenei Tulafono, ae AISEA SAFATA? O le vaeluaina o le Itumalo Safata lea ua fa’ataoto mai e le Tulafono, ua le o gatusa ma le fa’amamafa o le vaeluaina o Itumalo e faapea, ia VAELUA FAA-LE-AGANUU.

Afioga e, o le vaeluaina o Safata lea ua faata’oto mai e le Tulafono, ua le fa’a -le-Aganuu ae ua faaleaga i le Aganu’u. O le mea moni lau Afioga ma le Mamalu o le Maota, o le mea lea ua fai e le Tulafono lenei i lo matou Itumalo, ua fa’atupu vevesi, ua fa’ausutau i le manatu faapito, ua fa’amalosi e nanau i le i’a, ae le manumanu i le upega, ua fa’ataape i Aganu’u e ala i le vaeluaina o lenei Itumalo. O le vaeluaga ua fa’ataoto mai e le Tulafono mo Safata ua oia ma tavavae ai paia papa o le va nonofo o le Itumalo.

AISEA LAVA UA FAI AI FAAPEA SAFATA?

Silasila lau Afioga ma le mamalu o le Maota, o le aiga Sa Tunumafono e aofia ai le Itumalo atoa Safata.

O le “Alataua” o le faalagiina o se vaega o le nofo a faleupolu o le Itumalo o Safata.

O le aotelega o le faalagiina o le nofo a faleupolu o Safata e faapea:

“ O le mamalu i igoa Matua ma le nofoa Tula, Aalalata’i Taulauniu ma Aitu Tagata ma le mamalu i le Alataua.”

O le fesili, o fea le Itumalo o Samoa e palota i ai le mamalu i Igoa Matua ma le nofoa Tula ia Safata? E le o aumaia e le Tulafono.

O le isi fesili, o fea o palota i ai i si tamali’i o le Itumalo Safata?

Ae peita’i lau afioga ma le mamalu i le Palemene, e leai se paia, e leai se mamalu o le Itumalo Safata e aveesea pe afai e tuu sa’o i lona vaeluaga fa’a-le-Aganuu o le Itumalo Safata. Ma e leai se pepe, e leai se iota, e leai fo’i se aia tatau fa’a Suli o tagata palota a le Itumalo o Safata o noatia e palota ai i lona fa’asinomaga.

O le mea lea, ua matou toe sulu mai ai i lau Afioga ma le mamalu i le Palemene, ina ia tuu sa’o le vaeluaga o le Itumalo Safata i lona vaeluaga fa’a-le-aganu’u:  o “SI’ULEPA MA ONA TUA, O TOGAMAU MA ONA TUA.”

Ma o le saofa’iga fo’i lea o le maota i Togamau ma Si’ulepa pe a fonoa le Itumalo Safata. O paia fa’alagi o le Itumalo Safata, ua paia Si’ulepa ma ona tua, ua paia Togamau ma ona tua. E leai ni paia fa’alagi o Safata e fa’apea, ua paia Sa Tunumafono, ua paia le Alataua.

Afioga e, o lenei Tulafono ua ana fa’atupu le manatu faapito, le vevesi, ma le naunau i le i’a ae le manumanu i le upega. Ona ua taumafai nisi o lenei Itumalo e tuli lona ‘ai ma nau ta, i se auala faigofie, ae ua le manatu i paia ma mamalu o le va nonofo o le Itumalo.

O SI’ULEPA MA ONA TUA.

E aofia ai Sa’anapu, Sataoa ma Lotofaga. E aofia ai ona paia uma ma mamalu ma le tausiga a igoa Matua ia Si’ulepa ma ona tua.

O TOGAMAU MA ONA TUA

E aofia ai Niusuatia, Vaie’e, Fusi, Fausaga, Tafitoala ma Mulivai. E aofia uma ai paia ma mamalu o lea itu o le Itumalo Safata ma le tausiga a Taulauniu ma Aitutagata ma le mamalu o le Alataua ia Togamau ma ona tua. Ma o lea tulaga e malulautao ai aia tatau a le tagata palota e palota ai i lona fa’asinomaga e tusa ai ma a na Tu ma Aganuu.

Ae peita’i o le vaeluaga sese lea ua foalsia mai e le Tulafono, ua le ogatusa ai lona vaevaega ma lona fa’atinoga. Aua a fa’atino le vaevaega lea a le Tulafono, ona vaevae lea o Satunumafono i itu palota e lua, ae peita’i o lea e fa’apea mai le Tulafono e tasi le Itumalo palota o Satunumafono, tasi le itu palota o le Alataua. Ae mo le silafia e a outou Afioga, o Satunumafono e afifio i le Itumalo atoa o Safata, i le amata mai i Saanapu e tau i Mulivai

Matou te talitonu e puipui le Fono Faitulafono a Samoa i Tu ma Aganuu Mamalu a Samoa. Ae le gata i lea, o lo’o fa’apea fo’i ona aumai malosi i le FA’AVAE o le Malo Samoa le puipuiga o Tu ma Aganuu Mamalu. Ae peita’i o lenei Tulafono ua folasia nei, ua lepeti ai Tu ma Aganuu Mamalu a lenei Itumalo Safata.

Afioga e, matou te talitonu e le mafai e a outou Afioga ona fa’atagaina lenei mea e tupu i o outou Itumalo. O le ala lea o le tagisa ai ma le fa’aaloalo i la outou tofa fai mea tonu, se’i alofagia le afaina o Tu ma Aganuu Mamalu a lenei Itumalo i le vaeluga o tuaoi fa’a le Aganu’u o lea ua folasia mai e lenei Tulafono.

TULAGA TALAFEAGAI O LE AOFAI O TAGATA PALOTA.

O le isi tulaga e sili ona taua, o le vaelua o Safata ia Si’ulepa ma ona tua, o Togamau ma ona tua, Ona o i’ina o lo’o taoto i ai le vaeluaga fa’a le Aganu’u ma se vaeluaga talafeagai mo le numera o tagata Palota, i le paleni o le aofa’i o tagata palota o Itumalo fa’apalota nei e lua pe a vaevae, o Si’ulepa ma ona tua, o Togamau ma ona tua.

Silasila fo’i i fuainumera lea o le fa’ailoa atu i lalo, e tusa ai ma le vaeluaga a le Tulafono e pei ona folasia mai nei e le Tulafono, ma le vaeluga sa’o o le Itumalo Safata, e tusa ai ma fuainumera o le faiga palota na se’i mavae atu nei.

VAELUAGA FA’A LE AGANU’U O SAFATA

“SI’ULEPA MA ONA TUA, TOGAMAU MA ONA TUA.”

SI’ULEPA MA ONA TUA:

Saanapu               745

Sataoa               1,011

Lotofaga               499

Aofa’i                 2,255.

TOGAMAU MA ONA TUA.

Niusuatia               224

Vaiee                      451

Fusi                         461

Fausaga                189

Tafitoala              299

Mulivai                 386

           Aofa’i      2,010



  ESE’ESEGA   245.

VAELUAGA A LE TULAFONO LEA UA FOLASIA NEI.

“SA TUNUMAFONO MA LE ALATAUA.”

SAFATA SATUNUMAFONO.”

Saanapu               745

Sataoa               1,011

Lotofaga              499

Niusuatia             224

Vaie’e                   451

      Aofa’i          2,930.

SAFATA / ALATAUA.

Fusi                       461

Fausaga              189

Tafitoala             299

Mulivai                386

Aofa’i               1,335.

ESE’ESEGA       1,595.

Esesega o le vaeluaga sa’o fa’ale Aganu’u o Safata ia Togamau ma ona Tua, Si’ulepa ma ona Tua 245.
Esesega o le vaeluaga a le Tulafono ua folasia nei 1595, e sili ai palota a Sa Tunumafono i le Alataua.
Ae afai foi ae aveese ai ma palota a Sa Tunumafonoma Tapa’au o le Alataua ia e afifio faatasi i le Alataua, ona atili ai lea ona maualuga o le eseesega.

UPU TOMULI.

Afioga e, o le upu a le Perofeta o Mika, “feoa’i ma le Atua i mea uma e te faia, tausisi i le faamaoni ma faia le amiotonu.” O le tofa lauliliu a outou Afioga i le aso, o le fa’amoemoega mulimuli lena o lenei Itumalo i le faia o le mea amiotonu mo lenei Itumalo o Safata. “O le upu a le atunuu, afai ua sala tai, tonu uta.” Afai ua lape le Matagaluega ma le Komisi, tonu i lau Afioga i le Fofoga fetalai ma le mamalu i le Palemene.

Silasila i le faigofie o le vaeluaga o le Itumalo Safata, pe afai e tausisia lona vaeluaina faa le aganuu, e fetaui lelei ma le aofai o tagata palota i se fuainumera itiiti 245, nai lo 1,595 i le vaeluaga a le tulafono.

Lau Afioga i le Fofoga Fetalai, alofagia fai le amiotonu a le Atua. Lau Afioga i le Palemia ma lau Kapeneta, alofagia e puipui aia tatau o le mamalu o le au palota a lenei Itumalo, e palota ai i lona faasinomaga e pei ona ave i ai le faamamafa o le Vaeluaina o Itumalo faa Palota. Alofagia aua ne’i ati se pa i lo matou Itumalo i se mana’o o se to’atasi po’o se to’alua. Sui Mamalu o le Palemene, alofagia Safata ina ia tumau pa’ia o le va nonofo ai o le Itumalo i ona tulaga fa’a le aganu’u.

Afioga e, aumaia le amiotonu a le Atua e ta’afi nonoa ai lau Afioga i le Fofoga Fetalai ma Sui Mamalu o le Palemene aua se filemu ma le fa’atumauina o Tu ma Aganuu Mamalu ma Agaifanua a lenei Itumalo Safata.

Ma o le fa’atumauina o ia Tu ma Aganu’u mamalu, ma le soifua filemu o lenei Itumalo i le lumana’i i le tulaga o faiga palota, e fa’amoemoe i la outou fa’atofala’iga i le aso. O la outou fa’atofala’iga i lenei Tulafono, e manatua pea e lenei Itumalo e fa’avavau. Ia i ai le agaga o le Atua i la outou faatofala’iga i le aso.

Ua matou saunia ai lenei fa’atalauula mo le Itumalo Safata i le ava ma le fa’aaloalo e tatau ai.

Soifua.

ANAPU AIALI’I SOLOFA.
AFEMATA APELU AIAVAO.
TUIA PUA LETOA
AFEMATA MAFU
MAUGAGAOA PETELO
TUPA’I VAIMAGALO

Ole mafuaaga ole Ie Toga

Upu Tomua:
O aso anamua sa masani ona fai faalelega-fulu po'o manu o tagata Manu'a, e muamua la ona lauvae manu'ula. E ui lava la i le tele o manu e faalele ae faigofie lava ona iloa manu a le Tuimanu'a i ona lauvae. E faapena tala faasolopito sa tu'ugutu mai lea tupulaga i lea tupulaga. E ui lava ona leai ni tusi sa faamaumau ai, ae e te iloa le moni i muagagana o le atunuu na maua ai. O lo'o iai foi laufanua o lo'o loga ai tulaga o lea mea ma lea mea o lo'o avea ma latou pine faamau. E pei foi la o le measina o le atunuu o lo'o ta'ua nei o le 'ie-toga, afai o le measina o lona uiga, o se mea e sili ona taua. E tatau ona iai lona amataga ma le mafua'aga ua ala ai ona avea ma measina. Ia, alo maia ae o le'a ou taumafai e faamatala atu lona mafua'aga.

Aso Anamua:
I le amataga 900 A.D na amata ai ona pulea e Tuitoga ma ana au tau Samoa, sa amata ai ona pologa tagata o le atunuu, o le taimi foi lea na amata ai ona la'u e Toga tagata Samoa i Toga e nofo pologa ai. E faapea la se tasi taofi, na soifua ai i lena vaitaimi se Taupou lalelei tele o Maofa lona suafa, sa faatumulia lenei tamaitai i le faanoanoa ona o le alofa i tagata o lona aiga ma lona atunuu o lo'o nonofo pologa i Toga.

Mafua'aga na ala ai ona maua:
Sa tupu ane loa i lona mafaufau ma lona loto le mea e ao ona ia faia, o le'a alu e ofo atu lona ola i le Tuitoga ae faasaoloto tagata o lona atunuu o lo'o pologa i Toga. Sa amata loa ona fai le galuega o le sala mai o lau'ie ma tata'ai ma faaputu i luga o le papa i Vaifanua e ta'ua o Matatula. O le papa lea sa pusa ai i luga umu e tao ai tata'aiga lau'ie ona la'u lea i le vai ma fufulu mama ai, ona la'u ane lea ua faala'la i luga o le papa ua faaigoa nei e tagata "papa o Legaga'ie i Ma'opua." E faapea le tala e ese ai lava le lalagaina o lenei fala i fala uma e pei ona masani mai ai le atunuu. Ua mae'a nei le lalagaga o le fala ona aumai lea e Maofa fulu mumu o manu ua faafulu ai le itu pito i lalo o le fala. Faapea tala tuugutu o le atunuu o se fala e ese le aulelei, e ma'eu le momosi, ena'ena-vaivai, memea, toe vaivai e pei o se 'ie, ona faaigoa ai lea o lea fala, o le 'ie ona o le vaivai e pei o se 'ie.

Mafua'aga ua ta'ua ai o le 'Ie-toga.
Sa fatali Maofa se'i oso ane le la ona alu loa lea e ave lana 'ie ma ofo atu lona ola i le Tuitoga, ua taunuu le malaga a le taupou i le maota o le tupu, ona ia tatala lea o le fala ua pulou ai ma toatuli punou i luma o le Tuitoga. Ua momomo le loto o le tupu ma talia le talosaga a Maofa, 'au'a e fai o le aulelei o le taupou ae o se 'ie e uiga ese le matagofie, ona avea ai lea o Maofa ma masiofo o le tupu ae faaigoa lana 'ie o le "Pulou-ole-ola."

E le'i tele ni tausaga talu ona ofo atu e Maofa o ia i le tupu Toga ae lagaina loa le toilalo o Samoa ma ua o ese uma ai Toga ma Samoa. E faapea la le tala, na alu Tuitoga ma ave Maofa ma lana 'ie i Toga. E le'i umi ona taunuu le tupu ma Maofa i Toga, ona manatu ai lea o Tuitoga e ao ona faataunuu lana malelega ia Maofa. E faapea la le taofi, o le tausaga lea na faafoi uma mai ai e Tuitoga tagata Samoa sa nonofo pologa i Toga. O le matupalapala lea a le tupu i le masiofo, ona faae'e lea o le gafa maua ai le teine o Takalaua, ona faapea lea o le tala ua matua le teine ma o ia lea na toe momolia le Pulouoleola i Samoa. E faapea foi la talatuu na ave e Takalaua le 'Ietoga a lona tina ia Lesapioamoa o Pu'apu'a mai Amoa i Sisifo
. {Ou te leiloa la le mafua'aga na ala ai ona ave le 'ie ia Lesapioamoa}.

Faapea le tala ina ua taunuu le malaga i Samoa, sa ofo tagata i le manaia o le 'ie mai Toga. E faapea le taofi, o matai na api i le malae i lea aso ua ofo, ua silaloa, ua silamalo le au maimoa ma faapea,

"Sa-o-faa-la-lelei Tamasii Toga Malo-lelei."

Ona amata mai ai lea ona faaigoa le 'ie lea o le 'Ie-toga, au'a o le 'ie ua momoli mai ai e Toga le tamaitai o Takalaua le tama a Maofa i lona atunuu. O le 'ie foi lea ua faata'ita'i i ai le lalagaina o 'ie-toga, au'a sa leai ni 'ie faapea i aso anamua ua na "Fala Samoa" sa lalaga mai laufala ma laupaogo, o fala nei e malō e le vaivai e pei o le 'ie a Maofa. E ui lava la o le 'ie na momoli mai ai e Toga le tamaitai i Samoa, ae o le 'ie na lalaga e Maofa i Matatula o Vaifanua. A faausu la le gafa o le 'ie-toga, e tau ane lava ia Le'iato ma Togiola, o le fala lena na ave i Toga e sa'oloto ai le au nofo pologa. Ua faagalo ai le Fala Samoa anamua ae ua taua i le 'Ie-toga. A ave la le 'ie i Toga ona faaigoa lea i le "Malo afua, Malo na maua." Ae a foi mai lea 'ie lea i Samoa ona faaigoa lea o le "Pulouoleola."

O measina na maua mai ona o Maofa:
Maua ai le 'Ietoga, maua ai e Samoa le faiga o le 'ie ua ala ai ona vaivai, maua ai le lalagaina o le 'ie e pei ona iai nei. Maua ai le Pulou-ole-ola, maua ai e Samoa le auala e ifo ai ma talosaga atu e faamagalo agasala. Ua faaigoaina ai e Samoa le 'ie, o le 'ie-toga, maua ai le faaaogaina ole 'ie e momoli ai le teine faaipoipo i le aiga o lana tane, maua ai le 'ie o le mavaega ma le 'ie o le tofa.

Ua mafua nei mea uma ona o le loto alofa, lotonuu, loto-toa, le fefe e aumau i nuu ese, ma le poto o le tamaitai o Maofa. E ao foi ona tatou iloa o lenei Tausala o le teine mai Salaia (aka) Tutuila. Ona taunuu ai foi lea o le isi muagagana.

"O le ua na afua mai Manu'a."

Ona ou fesili lea, e le ole Agaga ea lea o le Atua na lima ta'ita'i ina ai le taupou o Maofa, e le ole Agaga faa-Keriso ea lea, ole ofoina atu o lona ola ina ia ola le toātele. Ne'i te'i ua ou vavevave atu ae oute talitonu, ole Agaga lava lea sa faatasi ma le Tama mai le amataga, lea na tino tagata, lea na maliu faalava'au i luga ole laau ina ia maua e tatou le ola e faavavau. E lelei le Atua, e lelei o IA i aso uma. God is good!

Ia malo lava le silasila faitau ae na ona ou faamanatu atu pea ne'i afaina se finagalo o se isi i lenei mau. O Samoa o le atunuu e talalasi. Ou te alofa tele i si oū atunuu. Soifua ma ia manuia.

"O le Ua na Afua mai Manu'a"

E mua pea ona faatulou atu i paia ma mamalu o Samoa i la outou faasausauga i luga o lenei itulau. Faafetai lava le onosai ma le faapalepale, ae o le agaga faafetai pea i le Atua e le uma ona o lo'o tumau pea le soifua maua male manuia i la outou tapuaiga. Ae o le a taumafai atu e toe fa'aauau le tatou tala o le "Untold History of Samoa". E iai foi upu e masani ona ou faalogo o gagana ai Ponaoo ma Tulatoa male au Fueloloa o Samoa e faapea, "O le Ua na Afua mai Manu'a", ou te talitonu o le tala lenei na maua mai ai lea muagagana faatasi ai ma ulua'i Ao po'o Pāpā i Upolu.

Ua maea nei ona tofi ulua'i Tumua i Upolu ona toe foi ai lea o Tuita'asaualii i Manu'a ae nofo Tuita'atagataola i Matautu'a'ai i Aleipata ma avea ai o ia ma Ao o Tumua. E le'i atoa le tausaga ae manatu le alii e sili ona toe foi i Manu'a o lo'o faatali mai ai lona to'alua ma le la fanau. E toe malamalama ane latou nei ua Tumua ua o'o le latou Ao o Tuita'atagataola i lona aiga i Manu'a, ona faaletonu ai lea o Tumua nei 'aua e moni ua uma ona tofi latou e fai ma Tumua ae leai se malosi'aga o i ai. O le mea ua tupu ua maua latou i le fememea'i 'aua ua latou le iloa le mea e ao ona fai, ua leai se mamalu o totoe ia i latou. Ona iai lea o le manatu i Tumua nei e tatau ona iai pea se feso'ota'iga ma Tuita'atagataola ma Tuita'asaualii. Ae le o lea e ao ona laua tofi ni ta'ita'i e pei o Tuita'a ma Tuita'a e faatui e faamalumalu i o latou itumalo. Ia ae o le faalavelave foi e le faigofie 'aua e mamao Manu'a e va i vasa, e faitau vaiaso o folau se va'a mai Upolu i Manu'a.

E ui lava la i le to'atele o i latou na tofia e fai ma ulua'i Tumua ae ese ai lava le sogasoga o le uso o Leifi Letaua ma Tautoloitua i le sailimalo na ala ai ona malaga i Manu'a e saili se Ao o le la itumalo. Ua taunuu le malaga i Manu'a ona fesili lea o Tuita'atagataola po'o ua asa'asa mamao mai e a? Ona tali lea o Leifi Letaua, "Lau afioga Tuita'atagataola, ia e alofagia lo ma 'auvasa mai i le mea mamao ona o le sailigamalo. Ua ma mautinoa e te le toe foi atu i Upolu, o le mea lea alofa mai 'aumai se tasi o lau fanau e faatui i lo ma'ua itumalo e fai ma o ma'ua Ao.

Na tali Tuita'atagataola, "Paga le faigata o le mea ua lua tagi mai ai ona e pele ia te au la'u fanau, e faigata foi ona matou nofovalavala. O lena lua te silafia, o au o matua fanau ma o le ala foi lena o lo'u tu'ua o Upolu ona o lo'u fia mafuta i fanau ma le nu'u na ola a'e ai. Sa toe talosaga Leifi Letaua, "Ioe moni lava o au o i'oimata o matua mea nei o fanau. Peitai ma te toe valuvalusia a'a o le la'au i lou finagalo, ua ma o mai e si'i aloa'ia se tasi o ou alo. Afai o le a ma foi fua ua leai se aoga o le ma malaga mamao mai. O le mea lea ia e alofa aumai se isi o lau fanau e fai ma ma'ua Pāpā po'o Ao."

Na toe saunoa lea o Tuita'atagataola ina ua ia lagona e alofa i le 'aigaalii a tulafale ona faapea lea, "Leifi Letaua ma Tautoloitua, e ui ina faigata le mea ua lua tagi mai ai, e mamafa foi ia te au le agaga sailimalo. O le mea lea e ui ina pele ia te au lo'u atalii ulumatua ae o mai ina 'ave e fai ma oulua Pāpā. O le igoa o le tama o Tuimaleatua. Na faafetai lea o Leifi Letaua ma Tautoloitua ia Tuita'atagataola ma taliu fiafia mai loa lea o le malaga 'aua ua maua lo la'ua Ao. O le tama la lea o Tuimaleatua ua faapuupuu e Leifi Letaua le igoa ia Tuiatua, ma o ia lea o le ulua'i Tuiatua o le Itumalo o Atua. O le pine faamau la lea o le osigafeagaiga a Tuitaatagataola ma Leifi Letaua ma Tautoloitua, ma o lo'o tumau pea le suafa Pāpā o Tuiatua i le Itumalo o Atua se'i o'o mai ai nei.

Ia e talu ai ona e fai si umi o lenei tala o le a fai ai sina malologa ona toe faauma atu ai lea. Ae o le ata lena o le faafanua o le Itumalo tele o Atua lea na tupu ai Tuiatua anamua.

O faigata o ananafi ua mafua ai le aso lenei
(Today's Triumph borne of yesterday's Struggle) Tusia e Vonney Stevenson

O faigata o ananafi ua mafua ai le aso lenei. ( Part 2 )
Based on a true story.
Ua maua le tala mai le ofisa o aoga ua faamanuiaina tamaiti e toa lua o le matou nuu e ulufale i aoga i Apia I le tausaga fou. O Leone le afafine o le faifeau ua ia maua togi e ulufale ai ile kolisi o Samoa,ao au ua ou maua le avanoa ou aoga ai ile kolisi o Avele.
Ua toa filemu lou loto aua o le upu moni sa tuu-fesili lou mafaufau poo le a sa’u mea ua sese ua mafua ai ona fia talanoa le faifeau ia te au.E le soona ulufale foi seisi ile maota o le faafeagaiga taulagi a le nuu. Atili foi lota popole aua leaga lava le toeaina e pau.E maualuga paepae le toeaina toe aulelei.E lauiloa uma e lo matou itumalo aemaise le matou pulega ma le matagaluega ile saua.A oo ina fai faatasiga a Autalavou poo aoga aso Sa,e le manao lava le toeaina e faiaina lona nuu.O se faifeau e mamalu ma maopopo ai le nuu,o se tagata e ote toe saua ae tumu ile alofa.E ita tele ise tagata e palaaai ae sili ona lilivau ise tamaititi e ulavale ma pisa i taimi o lotu.O afiafi o aso Sa e fai ai aoga tusi paia ma totofi ai tagata e tatalo ole lotu ae faai’u ile sasa o tamaiti na taeele ile sami ile aso Sa ile siusiu o le fai e tautau i tua o le fale o le toeaina.
Ua ou savali punou ile matou fale ma lo’u mimita tele,ua se mau manatu ua fetuleni mai i lo’u mafaufau.Tafefe e le’o toe mamao ae ou tama Apia pei o Simi.Lona uiga o lea ou vaai ile uafu ma le uati i aso uma.Ua ou manatua vave le faleoloa e iai i luma le ata o le asikulimi lapo’a lava.Ua ou fiafia olea ou toe vaai nei i Apia aua nao le tasi lava le aso na ou alu ai i Apia a'o ou laititi.Na ma o ai ma lo'u tina ile vaa karasini.
Ou te taunuu mai i le fale o i ai le pulenuu, na sau si tulafale e tala’i mai o le aso a taeao aso Gafua lea,o lea amata ai ona fai pusa fa’i. E taunuu loli a le malo ile aso Lulu e la’u pusa fa’i i Apia.O tua o le matou fale e togafa’i loaloa o leisi lea tupe maua mo matou pe a oo ina la’u le fa’i.Ua fiafia lava si o’u tina ona ua maua le fesoasoani aemaise o lea ole’a ou sauni mo le a’oga ile lua masina o lumana’i.
Ua malilie lo’u aiga ou te alu ile aoga i Apia. E ui lava fo’i la i so’u fiafia ae a ou mafaufau ane I le ausage o lo’u aiga ona ou faanoanoa lea.Ua matou faamavae ma lo’u aiga ou te sauni mo le aoga.O le aso o loimata ma tagisaga.Le aso e le mafai ai ele malosi o le loto ona natia loimata maligi o le alofa faatina sa tanuma’i i aso e tele ae na’o le ote ma le sasa na faaaliali i aso uma.O le aso o lapataiga ma timaiga,le aso o upu faamalosi ‘au ma a’oaiga e momoli e loimata,ae mavae ile suafa o le Atua le fesoasoani sili e ala i talosaga molia, matou te feiloai ai pea a’o ou feaagai ma aoaoga.
Ehhh..paga foi le faigata o le olaga nofo tumau latou,ua faivavale ota mafaufauga ma ua ota maoaluma i ota manatu.Ua ta fiu e tau autilo solo e leai se fale asikulimi ma se uati ae poo fea foi le maketi.Nao le lanu lauava ole togavao e siomia atoa le lotoa ole puataunofo,ma tama matutua o le kolisi pei ni sifi e faafitafita le faatonuina o matou laiti.E matautia le faigata ma le mamalu o tulafono a le aoga,a’o le mea e sili ona ota le fiafia ai o le leai o se avanoa e mafai ai ona ota finau i le sa’o poo le sese,tau lava o lota faalogo ma usitai
Ua toatele nisi tama ua faavaivai, o nisi foi ua sosola i tua ma le aoga, ae laki a’u ona ou te a’e mai ile aoga o loo taiulu ai le atalii o leisi fai pisinisi iloga o lo matou itumalo, le alii o Tai.E malamalama lelei lava la Tai ia te au ma si o’u aiga. E tausaga faatasi la Tai ma leisi tei o lo’u tina mai Fagaloa ma leisi alii e uso o ma tama i Laulii. Oi latou la ia na fai ma o’u fesoasoani i le aoga ma maua ai au tupe ma ni meaai.A oo ina maua ni a’u tupe mai a’u uo ona ou tago lea faaputuputu a sau si o’u tina e asi a’u ona ave lea i ai.
O taimi e sili ona faigata ia te au o le taimi ou te taoto ai ou te moe,toetoe lava ina ao nisi aso ou te le moe e alu lava lo’u mafaufau i lo’u aiga.Kalofa e,ai lava o otegia si ou uso o Tavita i le tuai ona fafaga o puaa.Ua ou misia lo’u faleoo e fai ai matou pele suipi ma le fanau tama a Sepe ma si fafafine o Simi,o le isi pito e tumu ile failaufala a lo’u tina,o lalo o pou e taatitia ai maa taotainamu e faaoga e tatao ai ietoga ale loomatua. Tafefe ai o saoloto ane le au leai ni faiai e gaoi lo matou maumaga ma tau fua o isalaelu aua sa fai lava o a’u e vaaia.Ua tau lo’u mafaufau ile moli saina e sosolo ai luga le pasio ona ou tago lea ile peni ma le pepa ona tusi lea o le ata.Ua uma ona tusi le ata ole moli ona sosoo lea ma le tusiga o igoa o le matou aiga,o Ema,o Lusi,o Tise,o Tavita,ua faasolo uma igoa o nai ou tuafafine laiti ua oo ile igoa o la’u puaa fagafao o Supo ua tusi uma ma ua tumu ai le laupepa.Na ou leiloa na ou moe,ae na ou te’i ile taufagu o a’u e Tai ou te nofo i luga e sauni la’u sapelu toeititi amata le galuega o le sasaina ole lotoa o le a’oga.
Ua mavae tausaga e lua ma ua sologa lelei la’u aoga,ua maua mai foi tala fiafia ua faamanuiaina Tavita ma Tise e ulufale ile aoga a le ekalesia Mamona i Sauniatu, peitai na musu lo’u tina ona e le gata ona e fai si mamao i uta ole a’oga, e leai fo’i ni o matou aiga i lea itu e ono nonofo ai.Ua maua le tonu ona aooga lea ile aoga maualuga a lo matou itumalo i Lepa, ae nao faaiuga o le vaiaso e mafai ona o ai e asiasi ilo matou aiga ae olea nonofo a’oga ile faifeau Saleapaga i aso uma o le vaiaso, ona e faigata le tausavali atu ilo matou aiga aua e iai le vaotele matou te tuaoi ai.
Ua oo ile taimi o le Eseta ua tapena fiafia foi la’u ato ou te aso Sa i lo’u aiga. Talofa e,ua sui la’u vaai i lo’u tina matua o Ema,ua le toe tutusa lona malosi ua tele lava ina taoto.O si ou tuafafine o Kalala le lona fa o matou ua faia le fatuaiga e fesoasoani isi o matou tina,o leisi ou tuafafine o Lina le lona 5 o matou ua tele ona taimi e fesoasoani ile fale o le faifeau atili foi o si faifeau e tasi lava lona atalii ma lona afafine na fai lea ua aoga nei ile kolisi o Samoa.O si ou tuafafine o Oli ole uii o matou pau lea o le tagata o loo faia feau a si loomatua o Ema.Ua matou aooga mamao uma ma Tise maTavita, masalo ole isi mafuaaga lea ole mai o le loomatua o Ema ole misia o matou.
Tiga lava nei suiga, ae tumau lava le gaioi ma le finau o si o matou tina o Lusi i ona tiute fai.Ua ou iloa nei ma mautinoa ua faaopoopoina le mamafa tu o le avega a Lusi.
Ua tonu nei i lo’u loto ma ua mausali lo’u manatu ou te le toe foi ile aoga,e ui lava o lo’u tausaga mulimuli lenei.Ua ou manatu ane,se a le aoga ou te naunau ai ia ou poto ae ailoga a inu si o’u tina?o le measili faafetai ua ou iloa ona tusitusi ma faitau tusi.Afai foi ou te poto,e mafai ea ona toe liliu le taimi ma faafoi mai le mafanafana ole mafutaga ma lo’u aiga aemaise ai lenei taimi oloo ausage ma manaomia se fesoasoani.Ua ou manatua le tala a le matou faiaoga o a’oga mea uma.Afai foi ua sese sa’u faaiuga ua ou malie atoatoa lava e talia ni laasaga ou te oo iai ile lumana’i.
Ua ou manatua le aso na sau ai le uso o lo’u tama mai Toamua, e manao e ave au i Amerika. Na musu lo’u tina ma lana tali ua malie lava matou te matitiva a’o lae matou te fevaaia’i aso uma.Ua maligi loimata o si o’u tina i la’u faaiuga.E ui lava i sona naunau mai i so’u lumanai ae na lolo lava lona mana’o i la’u faaiuga ona ua leai lava o se faamoemoe.
Ua alu aso ole olaga ma ua ou masani foi ile olaga fai fatu aiga.O la’u sapelu ma la’u ‘oso to tiapula o a’u uo mamae ia a ou liliu ile isi itu o la’u pa’u ma le mata fagota,o le matatao ma le ola,o a’u a’upega ia pea ou fetaia’i ma le gataifale.Ou te ala po e fai se supo esi poo se vaisalo,ona tunu lea ole laumoli e inuti ai nai ou tina,ona sosoo lea ma le faatietie ose faalifu poo le pusa o se suavai. E tunupau se moa pe faavai se manu mai le lafu e inai ai, ae a lagilelei le aso ona ou aapa lea e to ifo la’u foe, ma toso lo’u paopao ile sami ona ou folau lea ile vasa e saili ile alititai se ‘ai o le aso.
O popo ma le toga fa’i o alagatupe ia sa matou maua. E fai le sa a le nuu i popo e iai lava le taimi o le tausaga e tala’i mai ai ua taga.A taga la le popo, o leisi ma galuega lena ma lo’u tina e la’u le popo ma sali a uma ona ave lea e fua ile faleoloa o le aiga o Simi. O le faamama o fa’i ma sala lausului ma tafana tumoa ina ia fua lelei ma fetiitii leisi a’u galuega.Ou te taele ile afu liligi na’o lo’u ie e sulu faasaniti ile aso atoa, ae aoo ile afiafi ona faitau lea o ma tupe ma lo’u tina ona teu lea ile taele o lana pusa lavalava.
O nisi aso aemaise aso fiafia, e masani ona fai taaloga poka a toeaiina o le nuu. E fiafia tele Simi e tatai a’u mate o mate matamata ai ma ua avea ma ala ua ou fiafia ai ile taaloga. E iai isi taimi matou te sosola ai ma Simi i isi nuu matou poka ai leaga ua faasa a’u e lo’u tina.Ua lalau e Lusi lo’u tautalaititi ma le leai ose faaloalo le soli o taaloga a matai o le nuu.
A oo i aso faraile oute usupo e tope le meaai o le aso o Ema ma Lusi.O leisi lea a’u galuega masani.O aso Faraile uma e fai ai le faalaina a o’u tina faatoa tatala ile 12 ile aoauli. O le faamoemoe ina ia tuu atu pea o matou vaivaiga ma faanaunauga ile Atua, ao le sini o ia mea uma o le talosiaina o i matou le fanau. A’o lenei foi loomatua a moso e tiga na vaai mai ou te toatasi ae valaau mai lava e tautuana se taumafataga a le faafeagaiga ma ia aua nei galo se meaai e ave ile fale o le matai o le matou aiga o lana tauloto masani lea i aso uma.
Ua sui lava si o’u tina o Ema’ua vaaia lava lona vaivai, ua laulelei le loomatua ma valaau mai e aveatu le apa fafano. Ua sii e Kalala le apa fafano ona ou lagona atu lea o le faamanuiaga a le loomatua ile au kuka. Ua uma le meaai ona ou saofa’i ane lea ile umukuka e sali popo mo meaai a puaa ile afiafi.Ua ou tei ile nonofo ane i lalo o Simi ma lona tuafafine o Line faatoa taunuu mai Apia.Ua tuu mai le taga pepa o falaoa ma le pata, na sau Simi ma te o ile isi pitonuu o loo fai ai le poka ile afiafi.
E le’i iloa e Lusi le taimi na ou sola ai. E uma le taaloga ua leva le po ae ole mea moni ua ou manumalo tasi ile poka.Na ma tolotolo mai ma Simi ma le ma taga e tumu i pauni, o afatala,o seleni ma sisipeni o igoa nei o tupe.Ua alu Simi ona ou tolotolo lemu lea ma taoto i lo’u faleoo.
Ua malu le savali o lo’u faleoo ma ua manaia ai la’u moe, ua ou te’i ile taufagu o lo’u tina o Lusi i lo’u igoa.Ua vivini moa muamua ona ou nofo ae lea i luga. Ua musumusu mai lo’u tina ua tigaina si ona tina o Ema ae oute tamoe ile fale o ole loomatua o Pina le toalua ole matai o le matou aiga e sau sei ona fofoina aua o Pina e taulasea. Ua uma na fai le fofo ona ou toe alu lea e momoli Pina, ua vivini faalausosoo moa ua ao.Ua ou saofai nei i luga o le paepae maa ole matou fale ma tau autilo atu totonu ole fale o loo ola lava le moli matagi i autafa o le pupuni oloo iai i totonu si ou tina o Lusi.
Ua talo mai lo’u tina oute alu atu ona ou tu lea ma faagatasi ma le pupuni.Ua aapa ane le lima o Ema ma u’u le lima o lo’u tina ona tautala lea ma o ana upu nei ou te manatuaina pea e oo mai ile aso nei.
‘Ua lagona lo’u vaivai ma ua le toe umi so’u taimi. Tautuana ma oe lau fanau ia e tausi iai ma le faamaoni. E te inu i faamanuiaga pea e tausi ma le faamaoni lau fanau.Tautuana ma oe ou uso ma ou tuagane uma,ia fai oe ma tupuga ole filemu ia te outou uma ma ia outou fealofani. Alofa le Atua ma faamanuia oe ma lau fanau’
Ua tu le pasi ua faaoso ai si ou tuafafine o Kalala e alu e ta’u le tala i o matou aiga uma i Apia ae o a’u,ua sulu mau lo’u ie ona fai lea o lo’u mitiafu ua ou sauni oute savali e aami mai Tavita ma Tise. Ua iloa mai e si tamaloa o Sepe le mea ua tupu ona tuli mai lea o si ona atalii o Vasa ma te toalua ona e fai si mamao ole a’oga.Ua malamalama le taeao ona amata loa lea o le ma savaliga.Ua ma oo ile vaotele ona ma tamo’emo’e lea, o le vaivao lea e alofia tele e tagata ona e faimai tala tuu a le au matutua e feoai ai saualii e oo lava ile ao. E leai seisi o maua ma Vasa na toe tautala ina ua oo ile togavao ae nao le ma tamomoe lava ile fefe-vavale.E taatitia solo niu ma popo ile auala e iai foi le vai e tafe ifo ile papa.Tiga lava lo ma fia feinu ae na ma onosa’i lava sei ma oo i le nuu o lumanai.E tusa ma le lua itula le umi na ma o ai, masalo ua vave na ma taunuu ona sa ma tamomo’e.
Ua ma taunuu ona ma malolo laititi lea ma feinu, ua maua Tavita ma Tise ona matou sauni foi lea e toe alu le foleni ile matou nuu. Ua topetope lava i luma le tamoe a Tavita ae ou faatuatuai atu lava ona o Tise. Ou te savali lava ma maitau le taimi ua savali ile 9 ile taeao ae na ma o ese ma Vasa ma le fale ua te’a laititi le 6, o le aso 2 lea o Novema ile tausaga 1963.Tiga lo’u le lava ae ou faaloto tele lava i nai o’u tei ma topetope ia matou vave oo ma maua atu si o matou tina o Ema.
Ua pasi le togavao tele ua amata ona matou savalia le nuu tele o Lalomanu. Tafefe ai o tilotilo mai nisi faapea poo lea le mea ua matou nanati ai faapea i le taeao atili foi oloo ofu toniga aoga o Tise ma Tavita.
Ua pasi leisi nuu ma ua ou fiafia lava ua amata ona ou iloa atu le taatia mai o atu falega o le matou nuu ma ua galo ai le vaivai.O le matou fale e tu tonu ile ogatotonu ole matou nuu.O le tulimanu o le matou nuu e iai le fale o le aiga o Simi, lea e agai atu ai le matou foleni.E tolu fale e sosoo ma le fale o Simi ona oo lea ile fale o le faifeau.O le matou fale e i leisi itu o le fale o le faifeau.
E oo loa le matou tamoega i gatai ole aiga o Simi ae matou faalogoina loa le leo faatosotoso loloa o le logo.O le faailoga o le amiga paia a le Atua.
Ding..Ding…..Ding…..Ding….Dingggggg
‘Aueeeeee….ua maliliu toa ua maumau ai aupega o le taua.Ua lagia le maota i Falepoulima aua ua fai i lagi le folauga a si o matou tina.Talofa…. ua po le nuu, ua pouliuli le la, ua gase eleele le masina.’
Lau lupe sa ile solo ua le ‘olo
Ua lelea lou pale ua motusia la’u faasolo.
Manulele o le vao ma i’a o le sami loloto.
O se laau ile toafa ou te mapu i lou paolo.
Le mafutaga ma le tina pele i aso e tele.
Ua leai se failoto, ua pule lava le Atua poto.
‘Le oti e, o fea o iai lou tui?...Le tuugamau e o fea ea lou manumalo?
Aueeee….Eli Eli…LAMA SA PA TANI…..
To be continued…………..
See Translation

Ua lagona lo'u maalili ile sau o le vaveao,ona ou aapa lea e toso a'e le pito o lo'u ieafu tau le soo e ufiufi ai lo'u tino.O le leo malie o le pese o le lotu o le taeao a le loomatua o Ema,na pupula ai o'u mata ma ou iloa ai ua ao.O lo'u faleoo e i le tulimanu i tua atu o le matou fale afolau,o le ala lena ou te iloa uma mai ai gaioiga o loo faia i lumafale.O le tulimanu tonu lena e tatau ai le tainamu o le loomatua o Ema le tina o lo'u tina.E manino lelei i la'u faalogo i upu uma o le tatalo a le loomatua ma e oo mai i le taimi nei o lo o o'u manatua pea nisi upu o lana tatalo e faapea.'LE ATUA E,IA E FAAMANUIA I LENEI FANAU MA IA TOTOFI I LATOU E FAAOGAINA MO LAU AFIO I SOO SE ITU PE A TUSA AI MA LOU FINAGALO AMENE'
Ua ou nofo i luga ona pulupulu lea o lo'u ieafu ma faasagasaga agai ile savili.Ua taula'i la'u vaai i le sami,ona ou iloa atu lea o le fe'ilafi mai mai pea o moli o le motu o Tutuila e peise'a'i o loo vaeluaina le suasami ma le vanimonimo i gataifale o le Matamatagi.Ua faasolo la'u vaai ile itulagi i Sasa'e,O lo'o tutasi mai ai lava le fetu o Tapuitea o lona iila o lo o suluia ai le fafati o galu o le a'au.O le moli o le ava ua tau le iloa atu lona pupula ona ua amata ona ufitia i le ataata o le taeao fou.Ua tau la'u vaai ile faamalumalu mai o le taoto mai o le motu aulelei o Vini o lo o feagai ma le tolotolo o Tapaga.Le motu e foliga i se vaa o loo faa-fao ai o ona tua atu o loo taatia ai le isi tamai motu e igoa ia Nuutele ma ona autafa e i ai leisi motu e igoa ia Nuulua.Ua faasolo la'u vaai i le itu i sisifo ona ou iloa atu lea o le isi motu tele e igoa ia Namu'a,le motu lea faimai tala a toeaiina ma loomatutua e nofo ai le aitu e igoa ia Sosai,o ona autafa mai e taatia ai Fanuatapu le isi tama'i motu e tele ina maua ai laumei pe a tafafao ai tagata.Ua faasolo mai la'u vaai i luma o le matou fale ona ou iloa atu lea ole fafine failele o Vai o loo faaeva lana pepe ile sau o le taeao.O Vai o le fafine e sosoo matou fale,o lona toalua le tamaloa e igoa ia Sepe o le tasi o tautai iloga i le fagota ilo matou nuu.E ai i'a lava le latou aiga i aso uma.O le tele o taimi o Sepe o le fagota lava.Ua uma vave o'u mafaufauga ma a'u maimoaga ina ua leotele lo'u tina o Lusi e ku-ku moa,ua sosoo ma le tatagi o ipu o le fata ipu o faailoga ia e iloa ai ua tatau ona ou nofo i luga.Ua ou autago vave i lo'u ie aua o le upu moni e uma na fafaga moa ona taua'i mo'i lea o a'u i ipu popo.
Ua ou manatua le faatonuga a lo'u tina ou te uso po ma te o i uta e fai se galuega i le faatoaga ma tapena mai se umu aua o le afiafi le fiafia a le nuu,o le faamavaega ma a'oa'o mai Malua,ole a toe fo'i i totonu o le laumua ua uma le latou polokalame e ta'u o le FAAFOUINA sa faagasolo i lo matou itumalo.
O a'u e ulumatua ile fanau e toa ono(6)a o'u matua.E toa 4 teine ae na'o a'u ma lo'u uso o Tavita tama.E sosoo a'u ma lo'u tuafafine o Tise ae lona 3 Tavita.E na'o matou foi ua a'ooga i le aoga tulaga lua a le malo.O taeao uma matou te savavali ai ile aoga,ile nuu matou te tuaoi ae a oo ile afiafi ona matou o lea ile a'oga tusi maa i le fale o le faifeau.Ua lua(2) tausaga talu ona maliu lo matou tama ae faatoa 13 lena o o'u tausaga ae faatoa 2 masina le matua o leisi o'u tuafafine,le uii o le fanau.O si o matou tina o Lusi,e mamafa tu lana galuega,na te faia le pitolaau a le tina toe tama,ua atili ai fo'i fai o le taumafaiga o le fatu aiga,a'o le matou laiti toe toatele ma o loo tausi foi si ona tina,le loomatua o Ema.O Ema ua 64 ona tausaga ae ose loomatua galue malosi ma finau.O lana galuega ole vaaiga o matou aemaise o'u tuafafine laiti.E malosi tele lana fautua ae sili ona malosi lana tatalo.O Lusi o se tina e ote tele ma e iloa uma ele matou nuu.e le malolo ma e naunau tele i fe'au.E uma mai le faatoaga alu i le sami e fagota,a maua se avanoa ua lalaga fala poo se ietoga,o nei mea uma mo le tausiga o matou.Ua fai le faatonuga a lo'u tina ia Tise ma Tavita,e vele le vao ma tae le otaota i autafa o le fale ia sau le asiasiga a le faifeau ile aoauli o mama uma le fanua.
Ua alu le ma solo ma Lusi lo'u tina i le talaloa,e muamua i luma Lusi ma le ma fagupa'u vai aua ou te le iloa a'e ile niu,ou te mulimuli atu i tua ma le tauatoato e amo pito tasi ae uu le sapelu i leisi o'u lima.E ma te savali lava ma ma talanoa,ese foi le mamao toe a'ega o le auala.Ua tu Lusi ma mapuea ona aapa lea i le pito o lona ie tau le iloa mamanu i le palapala ma tau solo ai lona afu.O lona ofu lanu lauvao na'o le ua e pu ae leai ni lima,le ofu e ta'u e tagata Samoa o le kiputa pei se faamalu lona fua(pattern)toeititi o aso uma e ofu ai.Ua ma taunuu ona mapu ane lea i lalo o le mago,ua fisi e lo'u tina le esi pula ma sali le popo ma te tali manava ai,ona inu lea ole faguvai.
Ua faasino mai e Lusi le pito ou te galue ai.E manao ou te tago e vele uma le vao ua amata na sosolo a'e ma ufiufi le tutupu o le maumaga.Ua toe valaau mai e tope le gaioi meamanu o manaia le malu o le taeao.Ua ou punou ma amata la'u galuega ae ua amata le galuega a Lusi e lalafo le vao.Ua faasolo ina malosi mai le susulu o le la ma ua aumai le vevela.Ua tafe lauga'o lo'u afu,ua ufitia foi o'u lima ile palapala ma ua putaputa uma i le ai e loata ma manu ninii.Ua ou lagona le tigaina ona ou faapea ane lea i lo'u loto' "afai o lo'u tofi lea,tauto i agelu o le lagi ou te le mafaia"Ua agi mai le savili ma aumai le leo malie o le alii o Simi o loo pese leotele mai ile latou fanua lea matou te sosoo.Masalo Simi na iloa mai a'u fua ina pese leotele,a uma le pese Samoa ua pese palagi .Faapea o'u mafaufauga" amuia Simi e iloa gagu masalo e i ai sona pito afakasi.O Simi o le atalii fafafine o le sa'o ole matou nuu.E matua ia te au ma e faigaluega i Apia i le fale o Eveni.O se alii atamai ma e tele ana taleni,e fiafia tele le tupulaga e mulimuli ia Simi ona e tele ana tupe toe agamalie.E nao le aiga o Simi e iai le faleoloa ile matou nuu,o se tagata loto alofa ma e taulamua i mea uma aua le lelei o tupulaga o le nuu.Ua ou tu i luga ma tau falo lo'u tua ua tiga,ua faasolo la'u vaai ile matou fanua.E ola lausiusi talo ma taamu,o le isi itu e ola ai laupele ma Isalaelu,e iai le tipolo saina ile tulimanu e sosolo ai le pasio ua pula ona fua,e siomia uma le maumaga e le toga esi.O le isi itu e iai le vanu,o ona auvae vanu e ola ai le toga fala tele lava,fai mai Lusi o fala sa toto e lona tama ma ua ai e vao ma ua sosolo agai le vanu ua tele ina o atu isi tagata ma faaoga ona ua ausage lo matou aiga. Ua tau la'u vaai ia Lusi lo'u tina o lo o toto tiapula,o ona autafa ane o loo taatitia ai ma avega ua uma ona fai e ave i tai.O talo,luau,o nai popo,o esi pula ma leisi ato e iai isalaelu ma laupele e ave e falai ai se eleni ole afiafi.Ua ma sauni e fo'i ona e le'i faia le umu aua le alalafaga a le nuu i le po.E si'i loa la'u avega ae valaau mai Simi.."Semi faakali mai kakou o"
Toeititi lava le mafai na taofi la'u ata i teuga a Simi.O lona pale e lalaga ile moemoe o le launiu,e tui faataamilo ai pua tausaga,o lona taliga agavale e sili ai lona sei aute Samoa ua fetaui lelei ma le sesega o ona alafau ma laugutu mumu,masalo ua uma i ai fua o le loa le laau lea matou te tua'oi ai.Ua alu le matou solo i tai,e muamua lo'u tina sosoo a'u ae mulimuli mai Simi.Ua mana'o Simi e usu se pese,ona fai lea o le tonu o ia e leo faateine ae ou te ato.Ua to mai e Simi le pese ole vii o le matou itumalo.
"Ua ou sau nei se'i tatou aleaga.
I si o'u nuu moni o Aleipata."
Ua maualuga le leo o Simi ma ua tau oso lo'u ita,atili ai ou te le iloa uma upu o le pese.Ua toe to mai e Simi leisi pese ona ma pepese fiafia lea ma le leotetele aua o le vii o si o matou nuu ua iloa uma e le tupulaga.
" Sa ou taamilo,taamilo i le atu Samoa.
E leai o se fale e pei ole maota i Lalotoa.
E ese o si ona faiga e tu mai ile malelelele.
Le maota lena olo o susu ai le Sagapolutele."
Ua malie pesega ma ua galo ai le mamao o le ala aemaise le mamafa o avega,ua fai le tonu e feiloa'i ile afiafi ae ua taitasi le tagata ma fai sauniuniga aua le alalafaga a le nuu.
Ua fu'e le ma umu ma lo'u tina ona ou nanati lea e fai a'u teuga.Ua laga a'e lo'u mitiafu sesega lanu meamata,ua u'u faaiila lo'u ulu ile faguu mosooi Samoa,ua sulu lo'u ie ma ou savali loa ile fale ole faifeau.Ua leva ona tumu tagata,ua pisi foi le autalavou e faamaopopo faafiafiaga aua e uma le lotu,sosoo ma le taumafataga ona faai'u lea ile poula.Ua ou faaofiofi atu ma le ato e iai le matou saoga,e lima talo,lima luau,e ta'i 3 moa ma lauia ta'i 2 ale aiga.Ua mimita si o'u tina ile lapopo'a o matou laui'a ma ua saputu lesi faafetai ile isi faafetai isi matou tuaoi le tamaloa fai faiva o Sepe.
Ua i'u le po ile fiafia ma le manuia ua fiu fo'i le au maumoa e talie ia Simi.Ua fo'i le kolisi i Malua ma le mama ua lomi ma le vaa ua goto.
Ua vaaia le susulu ole masina ma ua feagai ma le oneone pa'epa'e i lumafale o atufalega o le aai ole matou nuu.Ua taitasi ma taape tagata i o latou aiga e malolo aua oloo lumana'i le aso Sa.Ua ula lo'u ofu ma ou savali agai le matou fale,ua lagona lo'u vaivai.Na ou te'i ile valaau mai ole tagata i lo'u igoa.Ua ou faliu i tua ona ou iloa atu lea o Tui le matou faifeau."Semi vave ile fale e moe,a oo taeao ona e sau lea ou te fia talanoa ia te oe"
E faia pea.

Tauva Latafale Auvaa mo le tausala o le lalolagi

by Merita Huch

Ua sauni atu nei le tamaitai o Latafale Auvaa mo le agai atu i Saina e faatapena ai lona ulu atu i le tauvaga mo le sailia o se Tausala o le Lalolagi poo le Miss World e pei ona o le a faia i le Beauty Crown Grand Theatre i Sanya, i Saina i le aso 19 o Tesema.
O le malosi o le tali mai a le Palemia i se faasalalauga a le Tausala o le Pasefika i le vaiaso na tea nei na manino ai le faate‘ia o le Susuga Tuilaepa Lupesoliai Sailele Malielegaoi i le laga e le tamaitai tausala o ana fuafuaga o le a lē alu i le faapalega o le Tausala o le Pasefika i le Atu Kuki ona e tatau ona i Saina i le taimi o lea faaaliga auā le sailiga Tausala o le Lalolagi.
O Latafale Auvaa lea foi ua filifilia e le Komiti o le Tausala a Samoa o le Lalolagi e fai ma sui o le atunuu i lea faaaliga tele. O le tausala muamua lea o Samoa ua filifili sa‘o mo lenei faamoemoe lea sa filifili ese mai lava le teine tauva mo Samoa i le tauvaga ua mavae atu. E ui i lea, o le a agai atu Latafale Auvaa i lea faaaliga e faia a o avea o ia ma Tausala o le Pasefika ma o le masina fou i le taimi tonu e amata ai le tauvaga a tausala o le lalolagi i Saina ae e tatau ona iai lea tamaitai i le Atu Kuki auā le faasee atu o lona pale ma lona tofiga i lē o le a manumalo i le tauvaga tausala a le Itulagi mo lenei tausaga.
Na alu Latafale i luga o le TVONE ma faalauiloa ai ana fuafuaga ona sa iai fesili na tuu atu i ai pe o le a faalēaogā ai la lona pale mai o le Tausala o le Pasefika i le taimi lenei pe afai e agai i Saina a o lei faapaleina le tausala o le Pasefika.
O le faamatalaga a lenei tamaitai ua mae‘a ona faaoo lana tusi e faanoi ai i le komiti o le Tausala a le Pasefika ma ua talia foi, ona o le manaoga e telē foi le aogā o le agai atu i le tauvaga tele faavaomalo lenei i Saina mo le saga unai ai o faalauiloa e faatatau ia Samoa.
Na maua foi se talanoaga a le sui o le Samoa Times i Aukilani ma le tamaitai faatonu o le Miss Samoa New Zealand, o ia foi o le Franchise/Licence Holder o le Miss World Samoa, le afioga Ulalemamae Te‘evā Matāfai, ma toe faamautinoa ai e Ulalemamae, sa latou uia lava le auala e pei ona tuuina atu ai le latou faatalosaga i le Komiti o le Tausala a le Pasefika ma taliaina mai.
O le ala foi lea o le faia o tapenaga a le tamaitai o Latafale e pei ona faagasolo i ni vaiaso ua tuanai atu, lea na malaga atu ai i le Atu Kuki e faia ni ana faalauiloaga mo le tauvaga o le Tausala a le Pasefika, ma na ta‘ua e lipoti ua talia ai le faanoi a lenei tamaitai, ma ua silafia uma ai lava le suiga o le a iai.
Ma o le tausala o le Pasefika na muamua atu ia te ia, lea o le a faapaleina le tausala o le Pasefika i le faaiuga o lenei tausaga.
O lona uiga e alu lava Latafale i Saina o loo pale lava o le Tausala o le Pasefika. Ae i le faatalatalanoaga ma le alii Palemia i le faaiuga o le vaiaso na tea nei na ta‘ua ai le faate‘ia o le Palemia i lea faaiuga ma na ia ta‘ua e tuu atu tauvaga e tatau ona ave i ai le faamuamua ae agai Auvaa latou i tauvaga e leai se mea e maua ai.
Ta‘ua e le susuga Tuilaepa Lupesoliai Sailele Malielegaoi, e tasi lava le tauvaga e ese mai i le sailiga o le Tausala a Samoa e ave i ai le faamuamua a le atunuu, o le tausala lea a le Pasefika, lea na faapea ona mafai ona faatino i lenei vaitau ona o le agai ane o Samoa e toe faamalosia i le tele o tausaga sa lē amanaia ai lava e le tele o atunuu o le Pasefika.
O se suiga ua vaaia nei le tele o atumotu ua toe agai mai e opogi, ma o Samoa lava ia ua tele ina vaavaai i ai atunuu e talimalo i tausaga taitasi i le faatamoega o lenei tauvaga ma le faatāua ua ave i ai auā le unaiga foi o le atinae o tagata tafafao maimoa mai i fafo.

O lona tofiga la o le Minisita o Pulega o Tagata Tafafao Maimoa mai i Fafo a Samoa, na ta‘ua e le Susuga Tuilaepa o ia e te‘ite‘i i le faaiuga ua faalauiloa e Auvaa ma o le a talanoa foi i le Komiti o le Tausala a le Pasefika i lenei mataupu.
Na ia ta‘ua o le manao tele le taumafai o Samoa e agai i nei tauvaga tetele faapea ae e tatau lava ona ave le faatāua i le tauvaga a le Pasefika, ma e oo ai loa se tamaitai i le tofi Tausala o le Pasefika, ona faigofie lava foi lea ona faalauiloa atu Samoa i le itulagi aemaise isi atunuu o le lalolagi atoa.
I luga o le itulau o le Facebook, o loo faaali ai foi le tele o lagona eseese o le mamalu o le atunuu i lenei mataupu ina ua aliai mai le tusitusiga i le upega tafailagi a le nusipepa o le Observer, ma e ui ina ta‘ua e nisi le tulaga atonu pe ua tiga le finagalo o le Minisita o Pulega o Tagata Tafafao Maimoa mai i Fafo a Samoa, o le afioga foi lea i le Palemia, pe atonu ua misi ona logo totino atu lana afioga i lenei suiga pe afai o le mea moni lena na tupu.
Peitai o loo māfuli lagona o le atunuu, e lē faapea ua misia e Latafale le tauvaga a le Pasefika ona e faapea o loo toe tauva ai, e ui e tāua foi lona auai e faamae‘a lelei ona tiute sa tauave mai o le Tausala o le Pasefika.
Ae o le auai atu o lenei tamaitai lalelei o lo tatou atunuu i lenei tauvaga tele a le lalolagi, atonu pe maua sona tulaga pe leai, peitai i le maitau atu i le tulai mai foi o lenei alo o Samoa e lē gata o se tamaitai lalelei tele i ona foliga vaaia, ae o lona atamai ma le talenia i le tele o vaega o le soifuaga e oo lava i taaloga, e mafuli ai lagona o le toatele, e mafai e Latafale i se tulaga matilatila, ona faalauiloa le Pasefika, aemaise lona atunuu moni o Samoa i ana tu ma ana aganuu i na foi faalagamaea tele o tauvaga a le lalolagi.
Sa iai se sailiga tupe na fuafua i le faaiuga o le vaiaso na tea nei mo le fesoasoani e ave ia Auvaa faapea ai le Tausala o Samoa ua iai nei lea e sauni atu i le tausinioga i le Atu Kuki ma ua toe tolopo nei se‘i toe soalaupule lenei mataupu ona faatoa faataunuuina loa lea.
Ae mo Latafale lava ia, o loo faaauau pea ana tapenaga ma nofosauni atu mo le tauvaga i Saina.
Tau ina ia manuia le alofaiva atu a lenei alo o Samoa i lona faamoemoe, i le avea ai o ia ma avefu‘a a Samoa i lea itu o le lalolagi.
O loo faalauiloa e le Miss World Samoa le itulau o le Givealittle i le upega tafailagi e mafai ona agai i ai soo se tasi e fia fai sana foai tau seleni e lagolagoina ai tapenaga a le tamaitai o Latafale Auvaa mo lona faamoemoe i le Tausinioga mo le Tausala o le Lalolagi.

O le galuega alofa a Poluleuligaga

Fai mai ina ua uma ona fati-tu le launiu mai Saleimoa, ona agai mai ai lea o le malaga faavauvau a Pa'iatea ma Pa'ialala mo o la’ua aiga i Vaopipi (aka Fogaa) i le mea o susu ai le Malietoa. E faapea le tala na muamua ona latou afea le tolotolo e latalata i Vaopipi male le latou iloa o lo'o api ai le Aloalii o Poluleuligaga, ona faalogo atu lea o le Aloalii i le lauaitu o fafine o le malaga ma le tagi masusu o le tama lea e ave e tali ai le sua a Malietoa. Fai mai ona momomo ai lea o le loto o le Aloalii ma ua faapea atu i matai o lo'o aumaia le malaga, "o maia ina tanu lo’u tino ma fili uma o’u mata i le launiu ina ia aua nei iloa mai o a’u e le tupu. Maua ai lea o le igoa o Tanumafili ona iloa ai lea e Pa'iatea ma Pa'ialala ma o la’ua aiga, o le'a faasaoina le ola o le tama.

Ona alalaga ai lea o Pa'iatea ma Pa'ialala ma faapea, "faafetai ua tuana’i atu lena atuvasa sa tumu i le faavauvau, ona maua ai lea o le igoa o le nuu o Tuanai. Faafetai ua tatou afea lenei tolotolo ua logo i tino ai le alofa o Poluleuligaga, ona maua ai lea o le igoa o Afega-alofa ma ua igoa ai le nuu o Afega-alofa ae ua faapuupuu ia Afega. Ona faapea atu lea o Pa'iatea ma Pa'ialala i le latou au malaga, "o maia tatou talia lupe o mau, atonu e tofa ma malie le finagalo o le tupu.” Fai mai le tala o le aso lava lea na alo atu le tupu e tali lana sua ae pa'ga lea, e talatala ane le filialii o mata o Poluleuligaga na muamua tau iai le vaai a Malietoa. Fai mai na matu'a faatumulia le tupu i le alofa i si ona atalii, ma ua faanoanoa ai nei le tupu ona ua ia iloa le mafatia ma le pologa o le atunuu i le tausi'ina o ia, ona faaifo ai lea ma le aso o Malietoa, maua ai ma le igoa o le nu'u o Malie ona ua tofa malie le finagalo o le tupu i le taulaga a Poluleuligaga.

O pine faamau la nei o lenei talatu'u o le atunuu.
1) Maua ai le igoa o Tanumafili, o le igoa lea o le malae fono o Tuanai.
2) Maua ai le igoa o le nu'u o Tuanai.
3) Maua ai le igoa o le nu'u o Afega (aka) Afega-alofa.
4) Maua ai le igoa o le nu'u o Malie.

Ae o le mea e sili ona taua, ua le toe ai tagata ai le tupu ma isi. E faapea le tala, e le'i umi ona tu'u le ai tagata o le tupu ae amata loa ona taoto ua gasegase, e le'i atoa le tausaga ae maliu Malietoa. Ou te talitonu o le gasegase lea na lagi faatafa ai le tupu, o le ma'i gau-alofa, gau-fatu ona ua mafatia le loto o le tupu i le salamo ona o le leaga o le mea na ia faia i tagata o le atunuu. Ua ia iloa le tiga o le alofa na mafatia ai Tama ma Tina e ona fanau ia na aumai tali ai lana sua.

Ua tatou iloa ai foi le loto alofa male le fefe o le Aloalii o Poluleuligaga ua ofo ina atu ai lona ola ina ia faaolaina le ola o le tama ma ea ai le pologa o le atunuu. E faapea le taofi e le na o Malietoa na ai tagata i lea vaitau, e toatele tamalii sa latou fai lenei agasala leaga, ae talu ai le toa o Poluleuligaga ma lana taulaga alofa ua muta ai le ai tagata. E moni e le'i maliu Poluleuligaga i le aso lea ae o lana taulaga, o le taulaga togiola faaola-tagata o lo'o au'i lea i le alofa faakeriso.

O le pelu afi lea na tuiā ai le fatu o le tupu e le o se pelu uamea ae o le pelu faaleagaga ua saunia e le Atua e taia ai le fatu o le tagata agasala. Ona ou toe manatua ai lea o le tala ia Aperoama ma Isaako, o le finagalo o le Atua ina ia iloa e Aperamo le alofa o le Atua ia Iesu Keriso ae na tu'u lava e faasauaina ma tutu'i ona aao i fao ma faalavaau i luga o le laau, ma maliu ai ina ia maua e tatou le ola e faavavau. Ua iloa e Aperamo le tiga o le alofa ae na toe faafiafiaina lona loto ona ua saunia e le Atua le taimai mamoe e osi ai le taulaga ma totogi ai a tatou agasala.

Samoa ou te mitamita ona o le Atua ma lona agalelei ia i tatou, au'a e le'i tu'u-lafoaia e le Alii o tatou tua'a i aso ua mavae, sa galue lava lona Agaga i o tatou tagata. E pei ona tusia, "O le faavae moni o le Faasamoa, o le vafealoa'i, faatuatua, ma le agaga fiafesoasoani. Ona ou fesili atu ai lea, e le o le alofa lea na faaali e Poluleuligaga?

Samoa e, āua ne'i faagaloina le taulaga alofa a Poluleuligaga, faamanatu atu i ā outou alo ma fanau ina ia latou iloa sa i ai Toa o Samoa.

Soifua loa ma ia manuia!

Tuumalo se tasi o failauga faitauina ole atunuu le tofa ia Tiufea Mulitalo Galuafa Matai'a

O le aso ma le fue, fai mai o ou gafatupu ma paolo taumalo, e faigata le valaau paia a le Atua. Ua ufitia le faletua ma le nofoaalo i le faavauvau. E talitonu fo'i le faamoemoe e le o se finagalo i ina po'o paolo ma gafa na e sau sema. Leai o le pule to'atasi a le Tapaau i le lagi. Tau ina ia faamaise le Atua i le faletua ma le nofoaalo 'aemaise le aigaalii ona ua usufono le fetalaiga ia Tiufea Mulitalo Galuafa Matai'a. Ae ua mafanafana ma olioli le agaga ona ua mae'a ona saunia e le Atua le auala tatou te toe faatasi ai. Faafetai i le Atua 'aua na maliu Iesu ma ua toe tulai mai i le oti ua mafai ai ona tatou maua le ola e faavavau. Ia pa'u se toa a ia toe tu mai se toa i le alofa o le Atua.

Ole ala na maua ai Tumua a Upolu
By Samoa_nei galo lau aganuu (facebook page)

O le taua muamua a Samoa ma Toga na mafua ai ona totofi Tumua i Upolu.

E faapea se tasi taofi o aso anamua sa leai ni Tumua i Upolu, o le agaga la o lenei mau e faamatala le mafua'aga na faavae mai ai Tumua. E i ai foi le talitonuga faapea, e tala tau Toga ae talalasi Samoa, ma o lo'o iai pea mata'aga ma upu fai o le atunuuu na maua mai ai o lo'o avea ma pine faamau o lenei taofi. E faapea le talitonuga na iai le Tuitoga e igoa ia Puala'i, o ia lea na muamua osofi'a Upolu ae le'i o'o i le taimi o Talaife'i'i ma Tuna ma Fata. E ao pea ona faailoa atu ae e te le'i faitauina lenei tala, e le tasi se taua i le va o Samoa ma Toga. O le taua muamua lea o le a e faitau i ai, ona tele lea o tausaga ua mavae ona toe osofa'i foi lea e Toga si tatou atunuu ma latou pulea Samoa i le tolu selau tausaga, ona tupu ai lea o le taua lona lua lea na laga ai e Tuna ma Fata le pologa o Samoa.

Sa tu le malo o Puala'i i Aleipata ma sa mamafa galuega ma faasalaga na ia faia i tagata Samoa, ma sa toatele foi tagata na faasalaina i le oti. Na fono faalilolilo ai lea o nisi matai Upolu ma maua ai le tonu e sili ona alu se savali e talosagaina toa tautaua o Manu'a o Tuitagataola ma Tuitaasaualii. O toa nei na ala ai ona le sao Tuitoga ma lana au tau i Manu'a, o tama foi nei na ala ai ona ta'ua Manu'a o le Motu Sa. Ona malaga ai lea o Paua ma Savea i Manu'a ma sa talia e Tuitagataola ma lona uso o Tuitaasaualii le talosaga. Sa manatu le uso e lelei ona fonoa le malaefono i Saua i Manu'a e fuafua lelei ai le siiga o 'au tau, ma o le ulua'i fonotaga lea i Samoa. O le a tasi le vaa e ape i le motu o Taema ina ia logo 'au o lo'o iai ae fai-la-matafaga uma le fua ma folau i Aleipata i le Vai-ole-tama, le mea o lo'o o iai le Tane-ole-itu. O le folauga lenei na maua ai le upu, "fai-la-matafaga" 'aua na fai la uma vaa i le matafaga ina o le a folau mai Manu'a i Upolu.

Na taunuu lenei folauga i le po ma sa matu'a faateia Puala'i ina ua osofa'i lona malo e au tau a Tuitagataola ma Tuitaasaualii. O le mea ua tupu ua sola Puala'i i Savaii ma sa tuliloa e Tuitagataola ma lona uso ae ua le maua ona ua tuuvaa Puala'i ma lana au tasi i Toga.

Na tuuvaa le fua mai Savaii ma taunuu i Mulifanua ma na lagona e Tuitagataola ma Tuitaasaualii le vaivai ona o le mamao o le mea na folau ma ai. Ona o ane ai lea o tagata o le nu'u ua aumai lala-laau ua to e faamalumalu ai le au uso. O le mea na iloa e tagata, o nei lala-laau e foliga tutusa ma se tala o se fale lona tu mai. O le ala lea o le faaigoa o lea vaega o Mulifanua o le "Tula-tala" 'aua e le ese ma se tala o se fale.

Na fai atu lea o Tuitagataola i lona uso, e tatau ona fai a ta'ua tofiga i'inei le Tulatala, e tofi toa e leleo i itu taitasi o le motu o Upolu. O toa nei o le a ta'itao i itumalo. E faaleo i ai 'upu ma taunuu tonu i ai savalii po'o ni faaalataua pe'a faapea e toe osofaia Samoa e ni au tau mai fafo. Ona faapea atu lea o Tuitagataola i lona uso, o le'a ou ui atu ma la'u au tau i luma o Upolu ma tofi tumua, ae ui oe ma lau au tau i tua-fanua a maea ona tofi tumua o le'a ta toe feiloa'i i Mata'utu-aai i Lalomanu.

Ona tofia lea e Tuitagataola le au uso o Laufiso ma Tapuala e ulua'i Tumua i Alofia'ana. Ona taunuu lea o le malaga i le ogototonu o le motu i le itu i matu ona tofia ai lea o Tui ma Mau e Tumua, lea e ta'ua nei o Tuisamau. Ona malaga ai lea o Tuitagataola i Aleipata ma tofia Leifi-Letaua ma Tautoloitua e Tumua, ma o le ulua'i Tumua foi lea i Atua. Ae malaga Tuitaasaualii ma lana au tau i saute o Upolu ma tofi le au uso o Latai ma Seela e Tumua i saute sisifo o Aana, e iai Falelatai ma Faleseela. Ona faaauau ai lea o le malaga aga'i i sasa'e ona tofia ai lea o Mau'ava ma Fuga e Tumua i saute o le Tuamasaga.

Ulua'i Tumua nei o Upolu:
Laufiso ma Tapuala - Alofiaana i Matu
Tui ma Mau - Tuamasaga i Matu
Leifi-Letaua ma Tautoloitua - Atua
Latai ma Seela - Aana i Saute
Mau'ava ma Fuga - Tuamasaga i Saute

E lima ulua'i Tumua o Upolu na tofia e Tuitagataola ma lona uso o Tuitaasaualii ae o le sailiga o Papa o Tumua na ala ai ona fa. 'Aua e le'i maua se papa o Latai ma Seela o le ala lea ua tasi ai le papa o Alofiaana i Matu ma Aana i Saute o Tuiaana.

(Note - o Taema o le igoa muamua lea o le motu o Salaia ae mulimuli ai faaigoa ia Tutuila). O le vaevaega o Itumalo na maua lea i le taimi o Pili ma lana fanau, ma o lo'o tumau pea. Ae o Tumua ia na totofi e Tuitagataola ma Tuitaasaualii ua iai suiga o lo'o iai nei ona ua tulai mai Malietoa. Ae o suafa o Papa na maua mai ia Tuitagataola o lo'o tumau pea, ae o le tala lena mo se isi aso.

Ia Samoa e, lo'u atunuu pele, afai ua sese se manatu ia faasa'o ane faamolemole, se taimi lata mai ona tuu atu lea o ulua'i Papa o Upolu ae se'i fai se malolo o le tusi upu. Faafetai lava le silasila faitau Samoa.

Your faithful and obedient servant o Samoa-ne'igalo Lau Aganuu.